काठमाडौँ महानगरपालिका वडा नम्बर–१५ को स्वयम्भूमा गत जेठ २ गतेबाट सञ्चालनमा आएको आइसोलेसन केन्द्रमा हाल १९ जना कोभिडका बिरामी रहेका संसाद श्रेष्ठले खबरहबलाई जानकारी दिए ।
सरकारले निर्वाचित सांसदहरूलाई ‘स्थानीय पूर्वाधार विकास’ कार्यक्रममार्फत बजेट दिने गरेको छ । सोही कार्यक्रमअन्तर्गतको ६५ लाख रुपैयाँमा प्रयोगबिहीन अवस्थामा रहेको आनन्द कुटी स्कूलको भवनलाई आइसोलेसन बनाइएको उनले बताए ।
‘जीर्ण रहेको विद्यालयलाई मर्मत सम्भार गरेर आइसोलेसन केन्द्र निर्माण गरेका हौं’ उनले भने, ‘अहिले समुदायमा आधारित रहेर सहयोगमार्फत जुटेको रकमले पनि कोभिडका बिरामीलाई सेवा दिइरहेका छौं ।’
बिरामीलाई दिनमा ४ पटक खाना, आवश्यक औषधि नि:शुल्क सेवा उपलब्ध गराइएको छ । आइसोलेसनमा बसेकाहरूलाई योगा समेत सिकाइन्छ भने बाहिर हिड्डुल गर्न सक्नेगरी क्षेत्र छुट्याएको उनको भनाइ छ ।
केन्द्रमा संक्रमितहरुको रेखदेखका लागि जनसरोकार स्वास्थ्य ट्रस्टका नर्सहरु खटिएका छन् । त्यस्तै आइसोलेसन केन्द्रबाट निस्केको फोहोरलाई अटो क्लिप गरेर निसंक्रमण गरी कुहिने र नकुहिने छुट्याएर प्याकिङ गरेर व्यवस्थापन गर्ने गरिएको छ ।
श्रेष्ठ सोही क्षेत्रबाट निर्वाचित प्रतिनिधिसभा सदस्य हुन् । उनले पहिलो पटक सांसदहरूले गर्न पाउने ‘स्थानीय पूर्वाधार विकास कार्यक्रम’ को सदुपयोग गरेका छन् ।
महानगरभित्र रहेका आइसोलेनमध्ये सुविधासम्पन्न आइसोलेसन केन्द्र रहेको बताउँदै उनी भन्छन्, ‘केन्द्रमा जुनसुकै ठाउँका कोरोना संक्रमितहरु आएर बस्न सक्नुहुनेछ ।’
