रुपन्देही । दाङमा चेक बाउन्स भएर पीडित हुनेहरुले मुद्दा दर्ता गर्न थालेका छन् । पीडितको निवेदनका आधारमा बैंकिङ कसुरमा प्रहरीले ८ जनालाई पक्राउ गरेर मुद्दा चलाएको छ ।
जिल्ला प्रहरी कार्यालय दाङका प्रवक्ता मुकुन्द रिजालका अनुसार यो आर्थिक वर्षमा १९ वटा चेक बाउन्सको मुद्दा दर्ता गरेर प्रहरीले घटनाको अनुसन्धान गरिरहेको छ ।
पटक पटकसम्म चेक काटेर दिएको तर चेक बाउन्स भएपछि पीडितहरुले आफू ठगिएको महशुस गरी प्रहरीमा उजुरी दिएपछि ८ जना चेक बाउन्समा पक्राउ परेका हुन् ।
चालू आर्थिक वर्षमा १९ वटा बैंक कसुरमा मुद्दा दर्ता भएको र ती मुद्दा ८ जना अभियुक्तलाई प्रहरीले समातिसकेको प्रहरीको तथ्यांकमा उल्लेख छ । प्रहरीका अनुसार बैंक कसुरमा ११ जना फरार रहेको र १९ जनाविरुद्ध मुद्दा चलिरहेको छ ।
चेक काटेको मितिले १ वर्षसम्म बैंक कसुर मुद्दा लाग्ने प्रहरीले जनाएको छ ।बैंकमा मौज्दात पैसा नभइ ठग्ने मनसायले चेक काटेर दिएमा बैंक कसुर मुद्दा आकर्षित हुने प्रहरीको भनाइ छ ।
बैंक कसुर मुद्दामा बिगो अनुसार असुल उपर गरेर बिगो बराबरको थप जरिवाना गर्ने कानुनी व्यवस्था छ ।
