काठमाडौं । प्रहरीले महिलालाई कम्बोडिया पुर्याएर बेचबिखन गरेको आरोपमा एकजनालाई पक्राउ गरेको छ ।
फेसबुकबाट चिनजान गरी एक महिलालाई कम्बोडिया पुर्याएर बेचबिखन गरेको आरोपमा धनकुटाका ३५ वर्षीय किसान राईलाई प्रहरीको मानव बेखबिखन ब्यूरोको टोलीले पक्राउ गरेको प्रहरी उपरीक्षक अनुराग कुमार द्विवेदीले जानकारी दिए ।
उनीहरुको गिरोहले उक्त महिलालाई कन्सट्रक्शन तथा व्यापारको काममा एक लाख मासिक तलब पाउने आश्वासन दिइ कम्बोडिया पुर्याएको प्रहरीको दाबी छ ।
उनीहरुले पीडितसँग रु चार लाख ५० हजार लिई काठमाडौँबाट काँकडभिट्टाबाट भारतको आसाम, नागाल्याण्ड, ग्वाटी हुँदै मनिपुर पुर्याएका थिए । त्यसपछि पैदलै म्यान्माको नाकाबाट थाइल्याण्ड प्रवेश गराई कम्बोडिया पुर्याएको खुल्न आएको प्रहरीको मानव बेखबिखन ब्यूरोले जनाएको छ ।
उनीहरुले चिनियाँ नागरिकलाई खाना पकाउने र घर सफा गर्ने भनी झुक्याएर यौन शोषण गर्ने गरी बेचबिखन गरेको भन्ने पीडितले जाहेरी दिएपछि ब्यूरोले फरार रहेका उनलाई पक्राउ गरेको हो ।
मानव बेचबिखन तथा ओसारपसार (नियन्त्रण) ऐन, २०६४ अनुसारको मुद्दामा अनसुन्धान भइरहेको प्रहरी उपरीक्षक (एसपी) द्विवेदीलेब बताए ।
