काठमाडौँ । टोकियो ओलम्पिकमा सोमबार डाइभिङमा चीनको हार, सुटिङमा आधा स्पर्धा सकिँदा अमेरिकाको प्रभाव, महिला जिम्न्यास्टिकमा अमेरिकामाथि रुसी ओलम्पिक कमिटीको अग्रताका समाचार प्रमुख बने ।
बास्केटबलमा अमेरिकाको फ्रान्ससँगको हार र अमेरिकी महिला फुटबल टोलीको स्विडेनसँगको फराकिलो हार लगायत धेरैले अनुमान नगरेको दृष्य जापानको टोकियोमा जारी ओलम्पिकमा देखिएका छन् । सोमबार स्केट बोर्डिङमा १३ वर्षीय जापानीले स्वर्ण पदक जितेकी छिन् ।
जापानले नै चीनलाई हराउँदै टेबल टेनिसको स्वर्ण जित्नु अर्को आश्चर्य पनि यसै ओलम्पिकमा देखिएको छ ।
अप्रत्याशित रूपमा रुसको टोलीभन्दा पछि परेको सिमोन वाइल्स नेतृत्वको अमेरिकाले महिला टिम स्पर्धामा त्यो अग्रता पार गर्दै स्वर्ण जित्न सक्छ कि सक्दैन भन्ने धेरैको चासो रहेको छ । मङ्गलबारको सबैभन्दा प्रमुख प्रतिस्पर्धाको रूपमा यसैलाई हेरिएको छ ।
जापान र अमेरिका बीच सफ्टबलको फाइनल हुनेछ । यसलाई पनि उत्तिकै चासोको साथ हेरिएको छ । मङ्गलबार नै महिला कायाकको फाइनल हुनेछ । माउन्टेन बाइकको महिला क्रस कन्ट्रीको पदकको टुङ्गो पनि मङ्गलबार नै लाग्ने छ । डाइभिङमा महिला १० मिटर सिन्क्रोफाइज्ड प्लेटफर्मको पदकको टुङ्गो लाग्नेछ ।
इक्वेस्ट्रियनको ड्रेसेज टिम ग्रान्ड प्रिक्सको भिडन्त हुनेछ । फेन्सिङमा महिला एपे टिम इभेन्टको भिडन्त हुनेछ । जुडोमा पुरुष ८१ किलो र महिला ६३ किलो तौल समूहको टुङ्गो लाग्नेछ ।
सुटिङमा १० मिटर एयर राइफल र एयर पिस्तोलकै टिम स्पर्धाका फाइनल खेल हुने छ । मङ्गलबार सर्फिङमा पनि महिला र पुरुषतर्फको पदकको टुङ्गो लाग्नेछ ।
पौडीमा पुरुष २०० मिटर फ्रिस्टाइल, महिला १०० मिटर ब्याकस्ट्रोक, पुरुष १०० मिटर ब्याकस्ट्रोकको भिडन्त फाइनल हुनेछ । महिला ब्याकस्ट्रोकमा विश्व कीर्तिमान धारी केली म्याककोनले स्वर्ण पदक जित्ने अनुमान गरिएको छ ।
महिला ब्रेस्टस्ट्रोकमा विश्व कीर्तिमान धारी लिली किङलाई बलियो मानिए पनि हिट चरण र सेमिफाइनलमा उनीभन्दा दक्षिण अफ्रिकाकी टाटीयाना सुमाकर बलियो देखिए पछि अमेरिकी वृत्तमा आशङ्का पलाएको छ । अन्य दुई स्पर्धाको उपाधि भिडन्त खुला मानिएको छ ।
तेक्वान्दोमा महिला ६७ किलो भन्दा माथि तथा पुरुषमा ८० किलोभन्दा माथिको भिडन्त हुनेछ ।
ट्रायथलनमा महिला एकलको पनि मङ्गलबार नै पदकको टुङ्गो लाग्नेछ । भारोत्तोलनको महिला ५९–६४ किलोको प्रतिस्पर्धा हुनेछ ।
मङ्गलबार हुने सुटिङमा महिलाको टिममा प्रतियोगिता अगाडि मानु भाकर र सौरभ चौधरीको जोडीलाई बलियो मानिएको थियो । प्रतियोगिताको एकल स्पर्धामा उनीहरूले कमजोर प्रदर्शन गरेपछि टिममा सफलता पाउने कुरामा शङ्का उत्पन्न भएको छ ।
दुई चिनियाँ टोलीलाई बलियो मानिएको छ । राइफलमा पनि चीन र अमेरिकालाई बलियो मानिएको छ ।
फेन्सिङको टिम एपेमा चीन बलियो टोलीको रूपमा रहेको छ । चीनसँग इटाली र इस्टोनियाको प्रतिस्पर्धा हुने अनुमान गरिएको छ ।
पौडीको हकमा रुसी ओलम्पिक कमिटीका प्रतिनिधित्व गरी रहेका क्लेमेन्ट कलेसिभ र अमेरिकाका रैन मर्फीको बीचमा हुने प्रतिस्पर्धा रोचक हुने अनुमान गरिएको छ ।
मङ्गलबार हुने तेक्वान्दोमा दक्षिण कोरिया तथा जुडोमा जापान नै हाबी हुने अनुमान गरिएको छ । बक्सिङका धेरै तौल समूहका प्रिक्वार्टर फाइनल खेल पनि मङ्गलबार हुने छन् । साथमा मङ्गलबार धेरै टिम गेमका पहिलो चरणका खेल हुने छन् ।
यी यावत भिडन्तको अनुमान गर्ने हो अमेरिका, चीन र जापान मङ्गलबारको समाप्तिमा पनि हाराहारीमै रहने छन् ।
–एजेन्सीहरूको सहयोगमा
