काठमाडौँ । आफ्नै नाममा रहेको राष्ट्रिय कीर्तिमान भंग गरेपनि पौडीका एलेक्स शाह टोकियो ओलम्पिकको हिट चरणबाटै बाहिरिएका छन् ।

टोकियोमा मंगलबार भएको स्पर्धामा एलेक्सले पुरुषको एक सय मिटरको फ्रिस्टाईलमा राष्ट्रिय कीर्तिमान बनाएका हुन् ।

हिट चरणमा उनले सय मिटरको दुरी ५३ दशमलब ४१ सेकेण्डमा पूरा गरे । यसअघि सो कीर्तिमान उनकै नाममा थियो । उनले यसअघि सो दुरी ५५ दशमलब ३८ सेकेण्डमा पूरा गरेर कीर्तिमान बनाएका थिए ।

७ खेलाडीबीच भएको हिट एकको स्पर्धामा शीर्ष स्थानमा रहेपनि एलेक्सले सेमिफाइनलमा स्थान बनाउन भने सकेनन् । कुल ७१ खेलाडीले प्रतिस्पर्धा गरेको हिट एकको स्पर्धामा एलेक्स ५९ औं स्थानमा रहेका थिए । हिट चरणबाट शीर्ष १६ खेलाडीले सेमिफाइनलमा स्थान बनाएका छन् ।

टोकियो ओलम्पिकमा सहभागी पौडीकी गौरिका सिंहले बुधबार महिला १ सय मिटर फ्रिस्टाइलमै प्रतिस्पर्धा गर्नेछन् ।