काठमाडौँ । नेपाल पर्यटन बोर्डले निषेधाज्ञाका क्रममा मुलुकका विभिन्न स्थानमा रहेको पर्यटकहरुको उद्धारको काम शुरू गरेको छ ।
त्यसका लागि बोर्डले विपद व्यवस्थापन तथा सञ्चार सेल गठन समेत गरेको छ ।
सेलले पर्यटकहरूको उद्धार तथा समन्वयका साथै नेपाल भारत एयर बुबल सम्झौता अनुरुप भारतबाट नेपाल आउने यात्रुहरुको होटल क्वारेन्टाइन व्यवस्थापन र अनुगमन लगायतका काममा सहजिकरण गर्ने छ ।
सोही बमोजिम बोर्डले बुधवार गृह मन्त्रालयको समन्वयमा देशका विभिन्न भागबाट पर्यटकको उद्धार गरी काठमाडौँ ल्याएको छ ।
जसअनुसार लाङटाङबाट ५ जना पोलिस, पोखराबाट ४ जना युक्रेनी र लुक्लाबाट २ जना अमेरिकन गरी ११ जना विदेशी नागरिकलाई उद्धार गरी काठमाण्डौं ल्याएको बोर्डले जनाएको छ ।
यस्तै संस्कृति पर्यटन तथा नागरिक उडड्यन मन्त्रालयको मिति २०७८ वैशाख २१ गतेको निर्णय अनुसार बोर्डले हवाई यात्रुको होटल क्यारेन्टिाइन मापदण्ड तयार गरी मन्त्रालयबाट सूचिकृत होटहरूसँग सम्पर्क र समन्ववय गरी सहजिकरण गरेको छ ।
बोर्डले महामारीको समयमा आवश्यक सूचनाको अभावमा कुनै पर्यटकहरू कतै अलपत्र पर्न नपरुन तथा अन्य सरोकारवाला निकायहरूले समेत आवश्यक परेको समयमा वेभसाइटमा रहेको नम्बरमा सम्पर्क गर्न अनुरोध गरेको छ ।
