काठमाडौँ । प्रतिनिधिसभा सदस्य एवं नेकपा एमालेका केही नेताले आफूहरूको हस्ताक्षर दुरुपयोग भएको जानकारी राष्ट्रपति विद्यादेवी भण्डारीलाई गराएका छन् ।

नेपाली कांग्रेस सभापति शेरबहादुर देउवालाई प्रधानमन्त्री बनाउने प्रयोजनका लागि आफूहरूको हस्ताक्षर दुरुपयोग गरिएको उनीहरूले बताएका छन् । एमाले वरिष्ठ नेता माधवकुमार नेपाल पक्षीय भनिएका सांसदको हस्ताक्षर दुरुपयोग भएको राष्ट्रपतिलाई उनीहरूले नै जानकारी गराएका हुन् ।

यसरी जानकारी गराउने सांसदहरूमा नेता सुरेन्द्र पाण्डे, योगेश भट्टराई, गोकर्ण विष्ट, घनश्याम भुसाल, नारायण खतिवडा, जयकुमार राई, गणेश पहाडीलगायत छन् । उनीहरूले आफूहरूको हस्ताक्षर दुरूपयोग भएको जानकारी गराएका हुन् । देउवालाई प्रधानमन्त्री बनाउने विषयले नेपाल समूहमा विवाद उत्पन्न भएको देखिएको छ ।

सुनसरी– १ बाट निर्वाचित सांसद जयकुमार राईले राष्ट्रपति कार्यालयलाई पत्र लेख्दै आफ्नो हस्ताक्षर दुरुपयोग भएकोमा गम्भीर ध्यानाकर्षण भएको जनाएका छन् । उनले बुझाएको पत्रमा भनिएको छ, ‘म एमालेको प्रतिनिधिसभा सदस्य हुँ । र मैले मेरो पार्टी अध्यक्षको विरुद्धमा विपक्षी पार्टीका नेतालाई प्रधानमन्त्री बनाउने गरी कुनै हस्ताक्षर नगरेको व्यहोरा जानकारी गराउँदछु । ‘

यसअघि उनले सामाजिक सञ्जाल फेसबुकमा स्टाटस लेख्दै हस्ताक्षर दुरूपयो भएको बताएका थिए । उनले लेखेका छन्, ‘सुनसरी क्षेत्र नं. १ बाट सूर्य चिन्ह लिएर निर्वाचित सांसद म जयकुमार राई नेकपा एमाले विभाजनको पक्षमा छैन, भन्ने कुरा धेरै अगाडिदेखि मेरो धारणा सार्वजानिक गर्दै आएको छु । आज फेरि नयाँ सरकार गठन गर्न भनी हस्तक्षर संकलन भइरहेको जानकारीमा आएको हुँदा म फेरि पनि पार्टी विभाजनको पक्षमा म छ‌ैन । र, काहीँ कतै यो प्रयोजनको लागि हस्ताक्षर नगरेको कुरा सबै पार्टी नेता तथा कार्यकर्ताहरूलाई जानकारी गराउन चाहन्छु ।

हेर्नुहोस् पत्र