काठमाडौं । एमाले सांसद डा. दीपकप्रकाश भट्टले कांग्रेस सभापति शेरबहादुर देउवालाई प्रधानमन्त्री बनाउन आफूले हस्ताक्षर नगरेको प्रष्ट पार्नुभएको छ । कांग्रेस सभापति देउवाले तपाईंको समेत हस्ताक्षर प्रयोग गरी प्रधानमन्त्री दावी गर्नुभएको छ नि भन्ने एन एन नेपाल डटकमको प्रश्नमा सांसद भट्टले आफ्नो समर्थन देउवालाई नरहेको प्रष्ट पार्नुभयो ।

‘प्रधानमन्त्री केपी ओलीको बिकल्प कांग्रेस सभापति वा अरु कोही हुनै सक्दैनन, पार्टीभित्र बिवाद समाधान गर्न कार्यदल बनिसकेको अवस्थामा हामीले प्रधानमन्त्रीको बिकल्प सार्दा कांग्रेस, माओवादी र जसपाले माधव नेपाललाई समर्थन गरेको अवस्थामा हाम्रो पार्टीबाट माधव कमरेडलाई प्रधानमन्त्रीका लागि भनेर हस्ताक्षर गरेका हौं, देउवाका लागि होइन, समर्थन पनि छैन,’ कञ्चनपुर क्षेत्र नम्बर ३ बाट निर्वाचित सांसद भट्टले एस एन एन नेपालसँग भन्नुभयो ।

उहाँले पार्टीभित्रको आन्तरिक विवादमा बिपक्षीलाई फाइदा पुर्याउने काममा समर्थन गर्नै नसकिने पनि प्रष्ट पार्नुभयो । कोरोना संक्रमणमा परी हाल घरमै आइसोलेशनमा रहनुभएका सांसद भट्टले माधवलाई समर्थन गरेको हस्ताक्षर देउवाको नाममा प्रयोग गर्नै नमिल्ने बताउनु भयो ।

यसअघि नै सांसद पदबाट राजीनामा दिएर कांग्रेस–माओवादीको सरकार बनाउने बाटो खुला गर्ने नेपालको प्रस्तावमा पनि सांसद भट्ट बिपक्षमा उभिनुभएको थियो ।

‘पार्टीभित्रको आन्तरिक संघर्ष समाधानका लागि कार्यदल बनिसकेको र त्यस्ले काम गरिरहेको अवस्थामा देउवालाई समर्थन गर्न नसकिने आफूहरुको साझा धारणा रहेको उहाँको भनाई थियो । यही धारणामा सांसदहरु नारायण खतिवडा, पबित्रा निरौला खरेल, गणेश पाहाडी रहनुभएको छ ।