झापा । कोरोनाका सक्रिय संक्रमित ५ सय नाघेको झापाको दमकमा नागरिक स्तरबाट आईसोलेसन सेन्टर निर्माण गरिएको छ ।

दमक उद्योग वाणिज्य संघ, नेपाल रेडक्रस सोसाईटी उपशाखा दमक, लायन्स क्लब, खानेपानी तथा सरसफाई उपभोक्ता समिति, सामुदायीक वन लगायतको सहभागितामा २५ बेड क्षमताको आईसोलेन सेन्टर निर्माण गरिएको हो ।

उद्योगी व्यवसायी तथा सामाजिक संघ संस्थाको पहलमा निर्माण गरिएको आईसोलेसन सेन्टर दमक अस्पताल अन्तर्गतको कोभिड उपचार केन्द्रलाई हस्तान्तरण गरिएको छ ।

दमकमा कोरोना संक्रमण उच्च भएको र जिल्लाका अन्य क्षेत्रको तुलनामा जोखिम बढेकाले विभिन्न क्षेत्रको सहकार्यमा आईसोलेसन सेन्टर निर्माण गरी दमक नगरपालिका अन्तर्गतको कोभिड उपचार केन्द्रलाई हस्तान्तरण गरिएको दमक उद्योग वाणिज्य संघका अध्यक्ष गोकुल श्रेष्ठले बताए ।

विगतमा भुटानी शरणार्थीहरुको रेखदेखका लागि दाताले उपयोग गरेका र लामो समयदेखि उपयोगविहीन संरचनाको सरसफाई गरी आईसोलेसन सेन्टर निर्माण गरिएको हो ।

कोभिड उपचार केन्द्र नजिकै रहेकाले आईसोलेसन सेन्टरमा पनि नियमित स्वास्थ्यकर्मीको निगरानी रहने अस्पताल सञ्चालक समिति अध्यक्षसमेत रहेकी दमक नगरपालिकाकी प्रवक्ता गीता अधिकारीले बताइन । यसअघि दमक अस्पताल अन्तर्गत ३० बेड क्षमताको कोभिड उपचार केन्द्र अस्थाई अस्पताल सञ्चालनमा रहेको छ ।