तेहरान – अमेरिकी पूर्वराष्ट्रपति डोनाल्ड ट्रम्पले इजरायल–इरान युद्धविरामको घोषणा गरे पनि इरानी राजधानी तेहरानमा इजरायली आक्रमण र ठूला विस्फोटहरू जारी छन्। अलजजिराले जनाएको छ कि ट्रम्पको घोषणाले शान्तिको आशा जगाए पनि तेहरानमा स्थिति झन् जटिल बनेको छ।

हाल पनि इजरायली आक्रमण जारी रहेको र त्यसको प्रतिकारमा इरानी हवाई सुरक्षा प्रणाली सक्रिय बनाइएको इरानी सञ्चारमाध्यमहरूले जनाएका छन्। राजधानी तेहरानमा लगातार विस्फोटका आवाजहरू सुनिइरहेका छन्।

इरानको तासनीम समाचार एजेन्सीका अनुसार, “इजरायली विमानबाट गरिएका आक्रमणको सामना गर्न इरानले आफ्नो एयर डिफेन्स सिस्टम सक्रिय पारेको छ।” हमशाह्री समाचार संस्थाले तेहरानको पश्चिमी र केन्द्रीय भागसहित कारज उपनगरमा समेत ठूलो विस्फोटका आवाज सुनिएको जनाएको छ।

डोनाल्ड ट्रम्पको पछिल्लो वक्तव्यप्रति इरानी सरकारको आधिकारिक प्रतिक्रिया आइसकेको छैन। तर अघिल्ला दिनमा वरिष्ठ इरानी नेताहरूले शान्ति प्रस्तावलाई शंकास्पद रूपमा लिँदै आएका छन्।

सर्वोच्च नेता आयतोल्ला अली खामेनीको केही दिनअघि सार्वजनिक गरिएको भिडियो सन्देशमा भनिएको थियो, “हामी थोपरिएको शान्ति स्वीकार गर्नेछैनौं।”

अब ट्रम्पको प्रस्तावित युद्धविरामलाई इरानले ‘सम्झौतायुक्त शान्ति’ मानेर स्वीकार गर्छ कि ‘थोपरिएको शान्ति’ भन्दै अस्वीकार गर्छ, भन्ने स्पष्ट भइसकेको छैन। अहिलेको परिस्थितिमा भने तेहरानमा युद्धविरामको सम्भावनालाई अझै पनि अनिश्चित मानिएको छ।