मुम्बई । बलिउडकी पार्श्व गायिका अनुराधा पौडवाल कोरोना कालमा संक्रमितलाई गरेको सहयोगका कारण चर्चामा छिन् । उनी आफ्नो अधिकांश समय च्यारिटीमा बिताइरहेकी छन् । उनी कोरोना संक्रमितको उपचारका लागि अक्सिजन र भेन्टिलेटर उपलब्ध गराइरहेकी छन् ।
दैनिक भास्करका अनुसार अनुराधाले यो काम छोरा आदित्यको मृत्युपछि सुरु गरेकी हुन् । आदित्यको गत वर्ष मृगौलाको खराबीका कारण ३५ वर्षको उमेरमा निधन भएको थियो । अहिले छोराको नामबाट उनले च्यारिटी सुरु गरेर सर्वसाधारणको सहयोगमा व्यस्त छिन् ।
‘मैले यूपीको दुई शहरमा अस्पतालमा अक्सिजन कन्स्ट्रेटर र भेन्टिलेर पुर्याएकी छु । मानिसहरु मरिरहेका छन् । यो कुरा अखबारमा पढ्दा पीडा हुन्छ । त्यहीकारण बढी भन्दा बढी सहयोग गरिरहेकी छु । मेरो सूर्योदय नामको फाउण्डेसन छ, जसका माध्यमबाट हामी १० स्कुलहरु र गाउँमा वाटर कन्जरभेसनमा लगातार काम गरिरहेका छौं’, उनले भनेकी छन् ।
आमाको जस्तै आदित्य पनि भजन गायक थिए । उनी आफैं संगीत कम्पोज गर्थे । फेसबुकमा उनले आफ्नो स्वरका कैयौं रेकर्ड गरिएका भजन शेयर गरेका थिए ।
आदित्यको नाम भारतको सबैभन्दा कम उमेरका संगीतकारको रुपमा लिम्का बुक अफ रेकर्डमा दर्ता छ । पद्मश्री र नेशनल अवार्डबाट सम्मानित अनुराधाले करिब चार दशकसम्म बलिउडमा गीत र भजन गाए । उनको विवाह अरुण पौडवालसँग भएको थियो ।
अरुण संगीतकार एसडी बर्मनको सहायक थिए । सन् ९० को दशकमा अनुराधा आफ्नो करियरको शिखरमा थिइन् । त्यही समय उनको पति अरुणको एक दुर्घटनामा निधन भएको थियो ।
