काठमाडौ । जनता समाजवादी पार्टी (जसपा) नेपालभित्रको विवाद यतिबेला उत्कर्षमा छ । पार्टी अध्यक्षद्वय उपेन्द्र यादव र महन्थ ठाकुर पक्षले शनिबार एक अर्कालाई २४ घण्टे अल्टिमेटमसहितको स्पष्टीकरण सोधेका थिए । जसको म्याद सकिएको छ ।

पत्रमा २४ घण्टाभित्र चित्त बुझ्दो र सन्तोषजनक जवाफ प्राप्त नभएमा राजनीतिक दलसम्बन्धी ऐन २०७३ र जनता समाजवादी पार्टी नेपालको अन्तरिम विधान २०७७ बमोजिम निस्कासनसम्मको कारवाही हुने चेतावनी दिइएको थियो । तर, हालसम्म कसैले स्पष्टीकरण बुझाएका छैनन् ।

अध्यक्ष ठाकुर अर्का अध्यक्ष यादवको प्रतिक्रियाको प्रतीक्षामा छन् । यादवको प्रतिक्रियाको आधारमा जवाफ दिने तयारीमा रहेको उनीनिकट एक नेताले रातोपाटीलाई बताए । अध्यक्ष ठाकुर आज पनि बबरमहलस्थित पार्टी कार्यालयमा पुगेर आफू निकट नेताहरुसँग छलफल गरेका थिए । ४ बजेसम्म कुनै पत्र नआएपछि उनी निवासमा फर्किएका थिए ।