काठमाडौं । भेरी अस्पतालका स्वास्थ्यकर्मीमाथि भएको हातपातको घटना आवेगमा आएर भएको निष्कर्ष निकालिएको छ । सो घटनाको अध्ययन गर्न गठित छानबिन समितिले उक्त निष्कर्ष निकालेको हो । छानविन समितिले उपचारको क्रममा आफन्तको मृत्यु भएपछि आवेगमा आएर मृतकका आफन्तले नर्ससहित चिकित्सकमाथि कुटपिट गरेको ठहर गरेको छ ।

समितिले अस्पतालको उपचार सेवामा सुधार गर्नुपर्ने बताउँदै त्यहाँ कार्यरत स्वास्थ्यकर्मीहरुले सेवाग्राहीलाई नम्र तथा शिष्ट व्यवहार देखाउनुपर्ने सुझाव समेत दिएको छ । गत बिहिबार ५३ वर्षीय डिल्ली रावतको उपचारका क्रममा मृत्यु भएपछि मृतकका भाइ मानबहादुर रावत, भरत रावत र छोरा लोकराज रावतले अस्पतालको आईसीयूमा तोडफोड गरी स्वास्थ्यकर्मीमाथि हातपात गरेका थिए ।

हातपात भएलगत्तै त्यहाँ कार्यरत स्वास्थ्यकर्मीले सुरक्षाको माग गरेका थिए । त्यसलगत्तै सहायक प्रमुख जिल्ला अधिकारी शंकरबहादुर विष्टको संयोजकत्वमा ७ सदस्य छानविन समिति गठन गरिएको थियो ।