काठमाडौँ। अमेरिकी पूर्व राष्ट्रपति डोनाल्ड ट्रम्पले चीनको वुहान ल्याबबाट कोरोना भाइरस फैलिएको भन्ने आफ्नो दाबी सही ठहरिएको बताएका छन् ।
उनले वुहानबाट नै कोरोना भाइरस फैलिएको आफ्नो दाबीमा अब हरेक देश तथा तथाकथित दुश्मनहरू पनि सहमत भएको बताए ।
चीनले विश्वभर मच्चाएको महामारीका कारण भएको क्षतिका लागि अमेरिका र विश्वलाई १० ट्रिलियन (खर्ब) डलर क्षतिपूर्ति दिनुपर्ने ट्रम्पको माग छ । ट्रम्पले सुरुवातदेखि नै यस भाइरसलाई ‘चिनियाँ भाइरस’, ‘वुहान भाइरस’ भन्दै आएका थिए ।
चीनले यसमा कडा आपत्ति जनाउँदै आएको थियो । चीनले ट्रम्पको यस भनाइलाई नस्लवादी सोचको उपज भएको बताएको थियो । यस वर्षको सुरुवातमा विश्व स्वास्थ्य संगठन (डब्लुएचओ) को एक टोली महामारीको तथ्य पत्ता लगाउन वुहान गएको थियो ।
उक्त टोलीले वुहानको ल्याबबाटै भाइरस लिक भएको हो भन्ने प्रमाणित गर्न पर्याप्त तथ्य फेला नपरेको बताएको थियो ।
