काठमाडौं ।  मिडफिल्डर अथुरो भिडालले आफ्नै पोष्टमा आत्मघाती गोल गर्दा चिली उरुग्वेसँग बराबरीमा रोकिएको छ ।कोपा अमेरिका फुटबलको समूह ‘ए’ अन्तर्गत सोमबार राति भएको खेलमा चिली उरुग्वेसँग १-१ गोलको बराबरीमा रोकिएको हो ।

खेलको २६औँ मिनेटमा इडुअर्डो भर्गासले गोल गर्दै चिलीलाई १(० को अग्रता दिलाएका थिए । तर, दोस्रो हाफको ६६औँ मिनेटमा भिडालले आफ्नै पोष्टमा गोल गरेपछि खेल १-१ नतिजामा पुग्यो । उरुग्वेले हानेको कर्नरमा भिडालले हेड गर्दा आफ्नै पोष्टमा गोल हुन पुगेको थियो ।

खेल बराबरीमा सकिएपछि दुबै टिमले १-१ अंक बाडेका छन् । यसअघि अर्जेन्टिनासँग बराबरी खेलेको र बोलिभियाविरुद्ध जित हासिल गरेको चिली जम्मा ५ अंकसहित समूहको दोस्रो स्थानमा छ ।

अर्जेन्टिनासँग हार बेहोरेको उरुग्वे भने दुई खेलबाट १ अंक जोड्दै समूहको चौथो स्थानमा छ ।