जनकपुरधाम । नेकपा माओवादी केन्द्र प्रदेश २ सरकारमा सहभागि हुने भएको छ । एक मन्त्री र एक राज्यमन्त्रीसहित माओवादी सरकारमा सहभागि हुन लागेको हो ।
माओवादी केन्द्रलाई सरकारमा सहभागि गराउन सत्तारुढ दलकै दुईजना मन्त्रीले राजीनामा दिएका छन् । शुक्रबार आन्तिरक मामिला तथा सञ्चार मन्त्री ज्ञानेन्द्रकुमार यादव र राज्यमन्त्री सरोज कुमार कुशवहाले मुख्यमन्त्री लाल बाबु राउत समक्ष राजीनामा बुझाएका छन् ।
मुख्यमन्त्री राउतले आज राजनीमा स्वीकृत गरी माओवादी केन्द्रलाई सरकारमा सहभागि गराउने तयारी गरेका छन् ।
एक मन्त्री र एक राज्यमन्त्री लिएर माओवादी सरकारमा सहभागी हुन लागेको माओवादी केन्द्रका प्रमुख सचेतक दिलीप साहले जानकारी दिए ।
उनका अनुसार दलका नेता भरत साह मन्त्री र रुवी कर्ण राज्यमन्त्री बन्ने तय भएको छ । नवनियुक्त मन्त्री र राज्यमन्त्रीका लागि आज ३ बजे शपथ ग्रहणको कार्यक्रम राखिएको छ ।
साह महोत्तरी क्षेत्र नम्बर १ को ‘ख’ बाट निर्वाचित सांसद हुन् । त्यस्तै कर्ण सप्तरीबाट समानुपातिक सांसद हुन् ।
जसपा अध्यक्ष उपेन्द्र यादव पक्षले अर्का अध्यक्ष महन्ठ ठाकुर पक्षका भौतिक पूर्वाधार विकास मन्त्री र तीन राज्यमन्त्रीलाई बर्खास्त गरेर गत जेठ २६ मा कांग्रेसलाई सरकारमा सहभागी गराएका थिए । सोही दिन माओवादीलाई पनि सहभागी गराउने कसरत गरिएको थियो । तर मन्त्रालय बाँडफडमा कुरा नमिलेपछि सरकारमा सहभागी भएको थिएन ।
