काठमाडौँ ।गृहमन्त्री बालकृष्ण खाणले श्वासप्रश्वाशमा समस्या ललितपुरस्थित मेडिसिटी अस्पतालमा उपचार गराइरहनु भएका लोकतान्त्रिक समाजवादी पार्टीका अध्यक्ष महन्थ ठाकुरलाई भेटेर स्वास्थ्य अवस्थाबारे जानकारी लिनुभएको छ ।
बुधबार साँझ अस्पतालमा पुगेर गृहमन्त्री खाणले ठाकुरको स्वास्थ्य अवस्थाबारे जानकारी लिनुभएको हो ।
पार्टी कार्यक्रमका लागि भैरहवामा रहेका अध्यक्ष ठाकुरलाई छाती दुख्ने, ज्वरो आउनेजस्ता समस्या देखिएपछि भैरहवास्थित भीम अस्पतालमा उपचार गराएर थप उपचारका लागि हेलिकोप्टरबाट काठमाडौं ल्याइएको थियो ।
ठाकुरको स्वास्थ्य अवस्थामा सुधार आएको उपचारमा सम्लग्न डक्टरहरूले गृहमन्त्री खाणलाई जानकारी गराउनु भएको थियो । खाणले भेटका क्रममा ठाकुरको शीघ्र स्वास्थ्यलाभको कामना समेत गर्नुभयो ।
गृहमन्त्री खाणले प्रधानमन्त्री शेरबहादुर देउवाले पनि स्वास्थ्य अवस्थाबारे जिज्ञासा राखेको ठाकुरलाई सुनाउनु भएको थियो । ठाकुरले आफ्नो स्वास्थ्य अवस्थामा केही सुधार आइरहेको बताउनु भयो ।