काठमाडौँ– उपप्रधानमन्त्री एवं रक्षामन्त्री पूर्णबहादुर खड्काले खेलकुद क्षेत्रको विकास र खेलाडीहरुको क्षमता अभिबृद्धिका लागि खेलकुद पूर्वाधारलाई प्राथमिकता दिन जरुरी रहेको बताउनुभएको छ ।

ललितपुर जिल्ला खेलकुद बिकास समितिद्वारा आज बुद्धि बिकास खेलमैदान लगनखेलमा आयोजित १४औँ जिल्लास्तरीय राष्ट्रपति रनिङ्ग सिल्ड प्रतियोगिताका अवसरमा उपप्रधानमन्त्री खड्काले राष्ट्रिय तथा अन्तर्राष्ट्रिय खेलाडी उत्पादनका लागि सरकारले सक्दो सहयोग गर्नेमा प्रतिबद्धता जनाउनुभयो । उपप्रधानमन्त्री खड्काले खेलकुद क्षेत्रको समग्र विकास गर्न तीन वटै तहका सरकारले मिलेर काम गर्नुपर्नेमा जोड दिनुभयो ।

उपप्रधानमन्त्री खड्काले भन्नुभयो, “अहिले पर्याप्त बजेट नहुँदा खेलकुदका लागि आवश्यक भौतिक पूर्वाधार निर्माण हुन सकेको छैन, त्यसैका कारण खेलाडीले पनि क्षमता अनुसारको प्रभाव गर्न सक्नुभएको छैन तर अब तीन वटै तहका सरकार एक भएर काम गरे खेल क्षेत्रको विकास हुन्छ ।

” खेल क्षेत्रको बिकासका लागि खेलकुद पूर्वाधारलाई प्राथमिकता दिन जरुरी रहेकाे भन्नुहुँदै उहाँले आफू सरकारको जिम्मेवारीमा रहँदा यस क्षेत्रको बिकासका लागि इमानदारीपूर्वक अगाडि बढ्ने प्रतिबद्धता व्यक्त गर्नुभयाे । यसका लागि तीनै तहको सरकार एकताबद्ध भएर लाग्नेमा उहाँले प्रतिवद्धता व्यक्त गर्नुभयाे । उहाँले यस प्रतियोगितामा सहभागी खेलाडीलाई मित्रवत प्रतिस्पर्धामा लाग्न आग्रह गर्नुहुँदै सफलताको शुभकामना व्यक्त गर्नुभयो । प्रतियोगिता तीन दिनसम्म चल्ने छ ।