जनकपुरधाम । गएको वैशाख २६ गते भेन्टिलेटर अभावमा जनकपुरधामस्थित एक जना कोरोना संक्रमितको मृत्यु भयो ।
मधेश स्वास्थ्य विज्ञान प्रतिष्ठान अन्तर्गतको प्रदेशिक अस्पताल जनकपुरमा उपचार्थ जलेश्वर नगरपालिका–४ का ५५ वर्षीय सुखिचन महतोको भेन्टिलेटर अभावमा मृत्यु भएको थियो ।
वैशाख ३० गते महोत्तरी गाउँपालिका–४ का ४२ वर्षीय रघुनाथ पाण्डेयलाई समेत श्वासप्रश्वासमा समस्या आएपछि जलेश्वर अस्पताल भर्ना भए । स्वास्थ्य बिग्रिँदै गएपछि अस्पतालले उनलाई भेन्टिलेटरमा राख्नु पर्ने भन्दै प्रादेशिक अस्पताल जनकपुर लैजाँदै गर्दा उनको बाटोमै मृत्यु आफन्त वैभव चौधरीले जानकारी दिए ।
प्रदेश २ को अस्पतालमा कतै आईसीयू र भेन्टिलेटर हुँदाहुँदै बिरामीको मृत्यु भइरहेको छ भने कतै सञ्चालनमा ल्याउन नसक्दा बिरामीले ज्यान गुमाइरहेका छन् ।
प्रदेश सरकारको वेवास्ताका कारण ज्यान गुमाएका महतो र पाण्डेय प्रतिनिधि पात्र मात्र हुन् । तर, सरकारले गत वर्ष गरेको निर्णय अझै कार्यान्वयन गर्न सकेका छैनन् । भेन्टिलेटर अभावमा संक्रमितको मृत्यु हुन नदिन प्रदेश सरकारले गत वर्ष वैशाखमा नै गरेको निर्णय अझै कार्यनव्यन हुन सकेको छैन् ।
प्रदेश सरकारले कोभिड विशेष अस्पताल बनाउने गरेको निर्णय एक वर्ष बिते पनि पुरा भएको छैन् । वैशाख ७ गते ५० वटा भेन्टिलेटर खरिद र कोभिड अस्पताल बनाउने निर्णय गरेको थियो । तर, कार्यान्वयन अझै हुन नसक्दा बिरामी उपचार अभावमा ज्यान गुमाइरहेका छन् ।
प्रदेशिक अस्पताल जनकपुरका मेसु प्रमोद यादवले प्रदेशिक अस्पतालमा भेन्टिलेटर नहुँदा धेरै संक्रमितलाई बाहिर रेफर गर्नु परेको बताए । प्रदेश सरकारले गत वैशाख ७ को मन्त्रिपरिषद् बैठकले भेन्टिलेटर खरिद गर्न ६८ करोड रुपैया स्वीकृत गरेको थियो ।
स्वास्थ्य आपूर्ति महाशाखाले प्रदेश सरकारले निर्णय गरिसकेको ६८ करोड बजेटबाट २ वटा पीसीआर मेसिन, ५० भेन्टिलेटर, पीपीई, सेनिटाइजर, मास्क, ग्लोब र अन्य स्वास्थ्य उपकरण खरिद गर्ने निर्णय गरेको छ । ती भेन्टिलेटरबाट ६ जिल्लालाई ५–५ वटा र जनकपुर तथा वीरगन्जमा १०–१० दिइएको छ ।
