काठमाडौँ । कोरोना महामारीका कारण स्थगित माध्यमिक शिक्षा परीक्षा (एसईई) र कक्षा १२ को परीक्षा सञ्चालनको उपाय खोज्न गठित कार्यदलले जेठ १५ गतेभित्र प्रतिवेदन पेश गर्ने भएको छ ।
समितिले परीक्षाबारे छलफल अघि बढाएको राष्ट्रिय परीक्षा बोर्डका सदस्य दुर्गाप्रसाद अर्यालले बताए । उनी कार्यदलमा पनि सदस्य छन् । उनका अनुसार समितिले परीक्षा सञ्चालनबारे विद्यालय सञ्चालकहरू, प्रधानाध्यापकहरू, शिक्षक संघसङ्गठनका प्रतिनिधिहरू र विज्ञहरूसँग सुझाव लिने काम गरिरहेको छ ।
अर्यालले भने, ‘हामी अहिले सल्लाह, सुझाव लिइरहेका छौँ, आगामी १५ गतेभित्र बोर्डलाई सबैका कुरा समेटेर प्रतिवेदनमार्फत विकल्प दिन्छौँ ।’ उनले कोरोना महामारीको अवस्था हेरेर परीक्षाको विकल्पहरूबारे छलफल गर्ने बताए ।
गत साता राष्ट्रिय परीक्षा बोर्डको बैठकले जेठ १३ गते शुरू हुने एसईई र जेठ २६ गते शुरू हुने कक्षा १२ को परीक्षा स्थगित गर्ने निर्णय गरेको थियो ।
स्थगनसँगै बोर्डले परीक्षा सञ्चालनका विषयमा अध्ययन गर्न ‘शिक्षा तथा मानवस्रोत विकास केन्द्र’ का महानिर्देशक वैकुण्ठ अर्यालको संयोजकत्वमा ५ सदस्यीय कार्यदल गठन गरेको थियो ।
राष्ट्रिय परीक्षा बोर्डका अध्यक्ष चन्द्रमणि पौडेलले समितिले प्रतिवेदन बुझाएपछि परीक्षाका विषयमा निर्णय गर्ने बताए ।
निर्णय कुर्दै परीक्षा नियन्त्रक
एसईई परीक्षाको सबै आन्तरिक काम सकिएकाले आफूहरू बोर्डको निर्णयको पखाइमा रहेको परीक्षा नियन्त्रक रुद्र अधिकारीले बताए ।
उनले परीक्षा नियन्त्रण कार्यालय तयारी अवस्थामा रहेको बताए । उनले भने, ‘पहिलेकै शैलीमा परीक्षा हुने भयो भने पनि एक हप्ताभित्रै सबै जिल्लामा प्रश्नपत्र पठाइसक्छौँ ।’
परीक्षार्थी ५ लाख
२०७७ सालको एसईई परीक्षाको लागि ५ लाख १७ हजार विद्यार्थीले आवदेन फारम भरेका छन् । परीक्षा सञ्चालनका लागि २ हजार १८ केन्द्र तोकिएको छ ।
२०७६ सालमा पनि कोरोना संक्रमण नियन्त्रण गर्न लकडाउन भएपछि विद्यालयले गरेको अन्तिम परीक्षाका आधारमा एसईई नतिजा प्रकाशन गरिएको थियो ।
कक्षा १२ को काम बन्द
बोर्डका अध्यक्ष पौडेलले परीक्षा स्थगित भएसँगै १२ कक्षाको परीक्षाको आन्तरिक काम पनि रोकिएको बताए ।
परीक्षाको लागि उत्तर पुस्तिका तयार राखिएको तर प्रश्नपत्र छाप्ने, परीक्षा केन्द्र तोक्ने लगायत कामहरू तत्कालको लागि स्थगित भएको उनले बताए ।
कक्षा १२ को वार्षिक परीक्षामा करिब साढे चार लाख विद्यार्थी सहभागी हुने बोर्डको अनुमान छ ।
